।।వందే ఽతి రమ్యమ్।।
వందేఽతి రమ్యం । విశ్వైక గమ్యమ్ ।
ఉన్మత్త దత్తం । గురుదేవమ్ ।।పల్లవి।।
సమస్త సృష్టిలో తన బాహ్య, ఆంతరిక సౌందర్యముతో ప్రకాశించేటటువంటి, జీవులకు యథార్థ ఆధ్యాత్మిక జ్ఞానమును బోధించేటటువంటి, ఉన్మత్త దత్తునిగా పిలువబడేటటువంటి, సమస్త ప్రపంచమునకు సద్గురువైనటువంటి గురుదత్తునికి శిరస్సు వంచి నమస్కారము చేస్తున్నాను.
వేదాంత సారం । నానావతారం । - భక్తోపకారం భజ దత్తమ్ ।।1।।
వేదాంత జ్ఞానమైన ఉపనిషత్తుల సారమైనటువంటి, అనేకములైన దివ్య రూపములలో అవతరించేటటువంటి, సద్భక్తులకు వారి వారి ఆధ్యాత్మిక మార్గ పురోగతికోసరం పరమ కరుణతో సహాయం చేసేటటువంటి గురుదత్తునికి శిరస్సు వంచి నమస్కారము చేస్తున్నాను.
సంసార పారం । రుద్రాక్షహారం । - నీహార గౌరం । భజ దత్తమ్ ।।2।।
ఈ సమస్త సంసారమునకు ఆవలివైపున్నటువంటి, కంఠమందు రుద్రాక్షమాలను ధరించినటువంటి, తెల్లని మంచు బిందువుల వంటి శరీర ధావళ్యము కలిగినటువంటి, గురుదత్తునికి శిరస్సు వంచి నమస్కారము చేస్తున్నాను.
కాషాయ చేలం । పాత్రాక్షమాలం । - ఆమ్నాయ మూలం । భజ దత్తమ్ ।।3।।
కాషాయ వస్త్రమును ధరించినటువంటి, రెండు చేతులలో కమండలము-అక్షమాల (జపమాల)లలను ధరించినటువంటి, నాలుగు వేదములకు మూలమైనటువంటి గురుదత్తునికి శిరస్సు వంచి నమస్కారము చేస్తున్నాను.
జ్వాలాక్షి ఫాలం । ఢక్కా త్రిశూలం । - కంఠాహి నీలం । భజ దత్తమ్ ।।4।।
నుదుటిపై మూడవదైన అగ్ని నేత్రమును కలిగినటువంటి, రెండు చేతులలో ఢమరుకము, త్రిశూలములను ధరించినటువంటి, కంఠమందు హాలాహలమును సేవించగా కలిగిన నీల వర్ణపు మచ్చను మరియు సర్పమును కలిగినటువంటి గురుదత్తునికి శిరస్సు వంచి నమస్కారము చేస్తున్నాను.
పాదాంత శక్రం । విచ్ఛిన్న నక్రం । - శ్రీ శంఖ చక్రం । భజ దత్తమ్ ।।5।।
దేవతలకే రాజైన ఇంద్రుడు తన పాదములను ఆశ్రయించినటువంటి, గజరాజు యొక్క పాదమును పట్టుకొన్న మొసలిని తన సుదర్శన చక్రముతో ఖండించినటువంటి గురుదత్తునికి శిరస్సు వంచి నమస్కారము చేస్తున్నాను.
కందర్ప రూపం । సౌందర్య దీపం । - యోగీంద్ర భూపం । భజ దత్తమ్ ।।6।।
కోట్లమంది మన్మథుల అందాన్ని తలదన్నేటటువంటి, సౌందర్యమే దీపమై ప్రకాశిస్తున్నదా అనిపించేటటువంటి, మహా మహా యోగీంద్రులకే యోగిరాజైనటువంటి గురుదత్తునికి శిరస్సు వంచి నమస్కారము చేస్తున్నాను.
మంత్రాత్మ బీజం । తంత్రార్థ భాజం । – శ్రీ యంత్రరాజం । భజ దత్తమ్ ।।7।।
సమస్త మంత్రములకు బీజరూపమైనటువంటి, సమస్త తంత్రముల ఫలమును పొందేటటువంటి, యంత్రరాజమైన శ్రీచక్రమునకు రాజైనటువంటి గురుదత్తునికి శిరస్సు వంచి నమస్కారము చేస్తున్నాను.