కంటి - సత్యమును గంటి ! నే పరమ సత్యమును గంటి !
ఎల్ల దేవతల వేషాల నటుడగు ! శ్రీ దత్త బ్రహ్మమును గంటి ! (పల్లవి)
1. మూడు ముఖముల నారు చేతుల వెలయు దేవుని
ముద్దులొలికెడి మూడు మూర్తుల వేషధారిని కంటి
పాత్రమాలలను గంటి ! ఢమరు శూలముల గంటి !
శంఖ చక్రముల గంటి ! కాల జటలను గంటి !
కమల లోచనుని గంటి ! కాషాయ ధారిని గంటి !
ఙ్ఞాన బోధకును గంటి ! జీవ తారకుని గంటి !
విధి గంటి ! హరి గంటి ! హరు గంటి ! గురు గంటి !
కామధేనువును గంటి ! కాల భైరవుల గంటి !
2. నాల్గు వేదములైన కుక్కలు మొరిగి తెలుపగ వింటి !
సత్యమును వింటి - నే పరమ సత్యమును వింటి !
సృష్టి పాలన విలయ కారకుడొక్కడేయని వింటి !
నా కన్నులను నలుపు కొంటి !
మాయ గాదిది మరల మరలను కంటి !
శ్రీ దత్త గురు పాదముల నంటి , శ్రీ దత్త గురుదేవులను గంటి !
కంటి, సత్యమును గంటి ! నే పరమ సత్యమును గంటి !