శ్రీకృష్ణ కీర్తన

ఋషి శ్రేష్ఠుల మానస సరోవరాలలో హంస వలె విహరిస్తున్న, కిరీటమందు నెమలి పింఛమును అలంకారముగా ధరించిన, తన మేనమామ యైన  కంసుడనే  రాక్షసుడిని ఒకే ఒక్క పిడికిలి గుద్దుతో సంహరించిన శ్రీ వేణు గోపాల కృష్ణమూర్తికి వినమ్ర నమస్కారము.

పద్మముల వంటి పాదములను ఒకదానిపై మరొకటి ఒంపుగా ఆన్చి, తన మురళీ గానంతో మధురామృతములను వర్షిస్తూ, ధగద్ధగాయమానంగా ప్రకాశించే పట్టు పీతాంబరములను ధరించిన శ్రీ వేణు గోపాల కృష్ణమూర్తికి వినమ్ర నమస్కారము.

చెవుల వరకు వ్యాపించి మెరిసే చేపల వంటి చక్కటి తేజస్సుతో కూడిన నేత్రములు కలిగి, ప్రభాత కాలంలో విచ్చుకునే ఎఱ్ఱ తామర రేకుల వంటి కనురెప్పలు కలిగి, పద్మ బాణముల వంటి చూపులతో సమస్త జీవులకు సంమోహనము కలిగించే శ్రీ వేణు గోపాల కృష్ణమూర్తికి వినమ్ర నమస్కారము.

శరీరమందు అనేక ముత్యాల హారములు ధరించినట్టి, గోపికల ఇండ్ల నుండి పాలు, పెరుగు, వెన్నలను దొంగలించినట్టి, బృందావనం లోని గోపికలకు అత్యంత ప్రియుడైనట్టి శ్రీ వేణు గోపాల కృష్ణమూర్తికి వినమ్ర నమస్కారము.

సాయం సమయమందు ఆవుల మందలను అనుసరిస్తూ, మధ్యలో కనిపించిన గోపికలకు ఎడమ కన్ను కొడుతూ, జగన్మోహిని యైన రాధకే సంమోహనాన్ని కలిగిస్తున్న శ్రీ వేణు గోపాల కృష్ణమూర్తికి వినమ్ర నమస్కారము.

అత్యంత విషపూరితమైన కాళీయుడనే మహా సర్పము యొక్క పడగలపై నాట్యం చేసి, ఝల ఝల ఝలమనే అందమైన శబ్దము చేసే మువ్వలను బంగారు కటిసూత్రమందు ధరించి, గోవర్ధనమనే మహా పర్వతమును తన చిన్ని చిటికెన వేలుపై మ్రోస్తూ కూడ చిరునవ్వులు చిందించే శ్రీ వేణు గోపాల కృష్ణమూర్తికి వినమ్ర నమస్కారము.

నుదుటిపై కస్తూరి పుండ్రమును నిలువుగా ధరించినట్టియు, శృంగారమునకు ద్వారమా అనెడి తన వక్షః స్స్థలమందు సుగంధంతో కూడిన తులసిమాలలు ధరించినట్టియు, తన యందే సమస్త భువన భాండములు అర్జునునకు ప్రదర్శించినట్టి శ్రీ వేణు గోపాల కృష్ణమూర్తికి వినమ్ర నమస్కారము.

తన రెండు ప్రక్కల రుక్మిణి, సత్యభామలను కలిగినట్టి, ఐక్య బుద్ధితో ఆశ్రయించిన వేయి మంది గోపికలను తన చుట్టూ కలిగినట్టి, బృందావనంలో రహస్యంగా చేసే రాసకేళి యందు ఎల్లపుడు ప్రీతిని కలిగినట్టి శ్రీ వేణు గోపాల కృష్ణమూర్తికి వినమ్ర నమస్కారము.