మానవ జన్మము నెత్తినందులకు సార్థకమయ్యెను వెంకన్నా।
నీ పై పాటల వ్రాసితినందురు - వ్రాసిన వాడవు నీవన్నా।
పద్మగ నీవె పుట్టితివిచ్చట తియ్యగ పాడితి ఓరన్నా।
పద్మారమణా ! ఆనందముతో కీర్తినిచ్చితివి నాకన్నా॥
మేడలు రూకలు బంధము లేవియు నా వెంట రావు వెంకన్నా।
ఈ పాటలనెడి దివ్య సంపదయె మము రక్షించును కొండన్నా।
నర జన్మమునిటు నీ గానమునిటు దయసేయుమెపుడు దత్తన్నా।
ఇంతకన్న వరమేమియు అడుగను కాదన బోకుము హరియన్నా॥
స్వర్గాధిపతియు వీటిని వినగా పరుగెత్తు చుండు నోరన్నా।
వీటిని పాడెడి నారదుడయ్యెను త్రిభువన పూజ్యుడు ఓ కన్నా।
గీతామృతమును త్రాగెడివానికి బ్రహ్మానందము చాలన్నా।
యమకింకరులను పొమ్మని వత్తురు విష్ణుదూతలు చివరోయన్నా॥
నీ పాట పాడ బాష్పలోచనము లొప్పగ విందురు వారన్నా।
భక్తి లేక వృథ పూజలు జపములు ప్రేమయె మార్గము ఓరన్నా।
అహంకారమున పాపాత్ముడనై పతితుడనైతిని వెంకన్నా।
పండిత వేషము పామరాధముడ ఉద్ధరించుమిక దత్తన్నా॥
వేద శాస్త్రముల చదివితి నేనని గర్వమెక్కెనిల నాకన్నా।
పద్మను గురువుగ చూపితి విచ్చట భక్తి మార్గమున హరియన్నా।
ఙ్ఞానమె దీపము భక్తియె మార్గము నీ దయ నడవగ ఊపన్నా।
దీప హీనుడును మార్గమునందున లక్ష్యము చేరును వెంకన్నా॥
నీ అందాలను పొందు పరచినవి పాటల విందులు చాలన్నా।
ఆకలి దప్పిక నిద్రయు లేవిట అమరుడ నైతిని వెంకన్నా।
అన్నమయ్య ఇటు పద్మయు అన్నా చెల్లెళ్ళ కివియె నతులన్నా।
నీ కర ఖడ్గము నీ కర పద్మము వారిరివురు గద వెంకన్నా॥
