భక్తి మద్యము త్రాగు ఉన్మత్తుడా! -
ధర్మాల తన్నేటి శ్రీదత్తుడా!।
గోపికలతో గూడు శ్రీకృష్ణుడా ! -
నీ లీలలె శ్రీ వేంకటేశుడా !॥
పద్మకై ప్రతి రాత్రి దిగివచ్చేవు -
భక్తి ప్రభావమిదియని చాటేవు।
స్వార్థములఁ దీర్చుకొన గిరినెక్కేరు -
వారికి శిలామూర్తి కనిపించేను॥
భక్తులకు చేతనగ, మాటలాడేవు -
స్వార్థులకు శిలగానె గోచరించేవు।
పాషాణ విగ్రహమె స్వార్థ జీవులకు -
కరుణా రసార్ణవము భక్త జీవులకు॥
కోరికలు దీర్చుకొనవచ్చు లుబ్ధులకు -
మాటలాడిన గాని మౌనమిచ్చేవు।
మాటలాడగ నీవె స్వయముగా కొండ -
దిగి వత్తువా ! స్వార్థ రహిత భక్తులకు॥
పద్మావతీ ప్రేమ ఎంత గాఢమో -
తెలియంగ తరమౌనె దేవతలకైన।
కాలినడకనె వచ్చు కొండరాళ్ళలో -
ప్రతి రాత్రి పాదముల బొబ్బలెక్కగా॥
లుబ్ధులకు పగలంత రాతి పాదములు -
కఠినంబులైయుండు మార్పులేకయె।
అర్థరాత్రులవియే మారు పద్మకై -
చరణ పద్మములుగా కోమలంబులై॥
