ఏడు కొండలవె ఎంతో ఎత్తుగ -
నీల గగనమును చుంబించునెపుడు।
నీలమేఘరుచి సంభ్రమ మతులై -
నీలవర్ణుడగు స్వామియనిఁ దలచి॥
కనక తోరణములుజ్జ్వల దీపము -
లుత్తుంగ రథము భక్తార్ణవమదె।
అడుగో రథమున గరుడుడు మూపున -
అడుగో అడుగో అరవిందాక్షుడు॥
రాజాధిరాజ పదవులున్నను -
కోట్ల కోట్లకును పడగ లెత్తినను।
పగ్గముల బట్టి రథమును లాగుచు -
స్వామి బండి పశు పదవికి పరుగులు॥
అదృశ్య రూపులు ఇంద్రాది సురలె -
రథమును లాగుచు స్వామి సేవలకు।
తోసుకతోసుక పరుగులెత్తుదురు -
ఈ నర చీమలు స్వామి ముందెంత?॥
సప్తమహర్షులు కనక కమలముల -
పదములనుంచుచు అర్చించుచుండ।
అర్చకులారా ! ఓ నరులారా ! -
మీరెంత తెలిసి వినయమునుండుడు॥
కసరబోకుడీ భక్తుల నెవరో -
ప్రహ్లాదుడో మరి తిన్నడో ఉండును।
స్వామి మనమునకు ఖేదము కలుగును -
తనకన్న భక్తులెక్కువ స్వామికి॥
