22 Jan 2002
జయ జయ సప్త గిరీశ్వర! వేంకటనాయక ! దత్తాత్రేయ విభో !
ఫాలమునందున పట్టెపు నామములజ్జ్వలమైన త్రిశూలముగా।
నామమునందున ఈశ్వర శబ్దము నాభి కమలమున బ్రహ్మయదే।
వెరసి త్రిమూర్తులుగా నెలకొంటివి దేదీప్యమాన వైభవమై।
జయ జయ సప్త గిరీశ్వర! వేంకటనాయక ! దత్తాత్రేయ విభో !॥1॥
తమ తమ పనులకు లంచములిచ్చెడి భక్త వేశ్యలకు మౌనముతో।
వజ్ర కిరీటము కనకాభరణములే కనిపించును నీ శిలలో।
స్వార్థ విముక్తులు భక్తులు చూతురు నీ కరుణారస బాష్పములన్।
జయ జయ సప్త గిరీశ్వర! వేంకటనాయక ! దత్తాత్రేయ విభో !॥2॥
అన్నమయ్య ఇట పాడుచు నెక్కుచు మెట్టు మెట్టునకు చూచెనుగా।
నవనవ సుందర రూపములెత్తుచు నెదురుగ కులికెడి నీ కళలన్।
స్వార్థ పూరితులు భక్తులు చూతురు కొండల బండల వృక్షములన్।
జయ జయ సప్త గిరీశ్వర! వేంకటనాయక ! దత్తాత్రేయ విభో !॥3॥
దిగి దిగి వత్తువు పద్మావతికై కొండరాళ్ళబడి గాయములై।
పదములు నిజముగ కమలములయ్యెను రక్త సిక్తములు ఎర్రనివై।
పద్మా ప్రణయము స్వార్థ రహితమది నిర్మల గంగా వాహినియే।
జయ జయ సప్త గిరీశ్వర! వేంకటనాయక ! దత్తాత్రేయ విభో !॥4॥
హే మధుసూదన ! హేమురమర్దన ! హే కంసాంతక ! దాశరథే !।
హే పీతాంబర ! హే తులసీసర ! హే మురళీధర ! శాంతినిధే !।
మంగా వల్లభ ! గోదా మోహన ! నాంచారీప్రియ ! వేంకపతే !।
హే శ్రుతి శాస్త్ర పురాణ సమన్వయ తత్త్వ సుబోధక దత్త గురో !॥5॥