జటాజూటమే కనక కిరీటము -
చంద్రరేఖయే ముత్యాలసరము।
ఫాలనేత్రమే అరుణతిలకమై -
సంకల్పించగ వేషము మారెను॥
ఉరగములయ్యెను స్వర్ణహారములు -
పడగల మణులవి మార్పును చెందక।
తనువున తెల్లని భస్మము మారెను -
సుగంధ కరమౌ అంగరాగముగ॥
గజాజినమయ్యె పట్టు వస్త్రముగ -
గంగాధారయె మల్లెలమాలగ।
చరణోరగములు మణినూపురములు -
కంఠ నైల్యమే కలువపూవుగ॥
ప్రమథగణంబులు రాజవేషముల -
మేళములూదుచు వాద్యనాదముల।
బయలుదేరగా బయలుదేరెనే -
పెండ్లి కొడుకై పరమేశ్వరుడు॥
మదవృషభంబదె నందీశ్వరుడు -
సాలంకృతుడై చిరుమువ్వలతో।
స్వామిని మోయుచు సుందరగతితో-
ఝలఝల ఝలఝల రవముల నడచెను॥
వేదమంత్రముల చదువుచు ముందుగ -
వాణితో నడచె బ్రహ్మదేవుడట।
పద్మ గోవిందులిరుపక్కలలో -
నడచిరి నవ్వుల కళకళలాడుచు॥
వాణి రచించిన మంగళ గీతుల -
మధుర కంఠమున పద్మ పాడినది।
మురహరుడంతట మురళినూదెను -
తలనాడించెను స్మితముఖుడీశుడు॥
ముక్కోటి సురలు ముందుగ పక్కల -
వెనుకను నడచిరి శంఖములూదుచు।
స్వస్తి వాచనము లొప్పగ చెప్పుచు -
సప్త మహర్షులు సరసనె నడచిరి॥
గంధర్వగణము గళమెత్తిపాడె -
జయ జయ శంభో జయ శంభో! యని।
కిన్నరు లందరు వీణల మీటిరి -
అప్సరసలంత నృత్యమునాడిరి॥
