శివుని లింగము - భవుని లింగము।
హరుని లింగము - ఆత్మలింగము
అదిగో చూడుడు - అనుభవించుడు।
అమర దుర్లభా - నంద ముక్తిని। (పల్లవి)
సృష్టిపాలన ప్రళయమూలము -
ఆదిదేవుని ఆత్మలింగము।
అద్భుతంబగు శుద్ధతేజము -
దేవదేవుని ఆత్మలింగము॥
ఆ మృకండుజ ప్రాణదానము -
అమరనాథుని ఆత్మలింగము।
మృత్యుదేవుని ప్రాణఘాతము -
కాలకాలుని ఆత్మలింగము॥
చంద్రరేఖను కల్గినట్టిది -
పార్వతీపతి ఆత్మలింగము।
మూడు అడ్డపు భస్మరేఖల -
నీలకంఠుని ఆత్మలింగము॥
గంగ జలముల సదభిషిక్తము -
గరళకంఠుని ఆత్మలింగము।
మధ్య కుంకుమ భ్రాజమానము -
వామదేవుని ఆత్మలింగము॥
సృష్టి చేయగ ప్రథమకామము -
సుందరేశ్వరు ఆత్మలింగము।
శక్తి రూపము సత్తరంగము -
సంగమేశ్వరు ఆత్మలింగము॥
వేద జలధుల మథన దక్షము -
కాశికాపతి ఆత్మలింగము।
ఖలులఁ ద్రుంచును సురల బ్రోచును -
కాలభైరవు ఆత్మలింగము॥
కామదేవుని కాల్చివేసిన -
సోమనాథుని ఆత్మలింగము।
ఆ గజాసురు కుక్షిజీల్చిన -
భీమశంకరు ఆత్మలింగము॥
కాలపాశము నడ్డుపెట్టిన -
మహాకాలుని ఆత్మలింగము।
సాయమందున నాట్యమాడెడి -
నాగేశ్వరుని ఆత్మలింగము॥
అర్థరాత్రిని ఉద్భవించెడి -
శ్రీగిరీశ్వరు ఆత్మలింగము।
అన్ని అఘముల కాల్చివేసెడి -
రామేశ్వరుని ఆత్మలింగము॥
భ్రాంతినంతయు రూపుమాపెడి -
వైద్యనాథుని ఆత్మలింగము।
త్రికరణార్పణ సేవ్యమానము -
త్రియంబకేశు ఆత్మలింగము॥
కేళితాండవా నంద లోలము -
కేదారపతి ఆత్మలింగము।
కృష్ణుడెప్పుడు పూజఁ జేసెడి -
ఘృష్ణీశ్వరుని ఆత్మలింగము॥
పాశుపతమును పార్థునకొసగు -
పరమేశ్వరుని ఆత్మలింగము।
తిన్నడొసగిన కన్ను గలిగిన -
వ్యోమకేశుని ఆత్మలింగము॥
పాలధారల స్నానమాడెడి -
పశుపతీశుని ఆత్మలింగము।
పెరుగు ముద్దలు జాలువారెడి -
శర్వదేవుని ఆత్మలింగము॥
గోఘృతంబుల తడిసినట్టిది -
గోకర్ణపతి ఆత్మలింగము।
ఫలరసంబుల తీర్థమాడిన -
చంద్రశేఖరు ఆత్మలింగము॥
మహిషవాహుని మట్టుఁబెట్టిన -
కాళికాపతి ఆత్మలింగము।
నారసింహుని నిలువరించిన -
శరభేశ్వరుని ఆత్మలింగము॥
దక్షశిరమును తుంచివేసిన -
వీరేశ్వరుని ఆత్మలింగము।
త్రిపురాసురుల మట్టి కలిపిన -
త్రిలోకశాసి ఆత్మలింగము॥
ఆంజనేయుడు మోసితెచ్చిన -
కైలాసపతి ఆత్మలింగము।
గణేశుడెత్తి జార విడిచిన -
నందివాహుని ఆత్మలింగము॥
క్షీరజలధిని శిశువు కొసగిన -
స్కందజనకుని ఆత్మలింగము।
హాలహలమునె ఆరగించిన -
కాలకంఠుని ఆత్మలింగము॥
గౌరి తపమును పరీక్షఁ జేయు -
హాటకేశ్వరు ఆత్మలింగము।
ప్రమథ గణముల నృత్యలోలము -
వృషభేశ్వరుని ఆత్మలింగము॥
నాదసాగర గాన మోదము -
వేదవేద్యుని ఆత్మలింగము।
తాండవంబున చిందులేసెడి -
చిన్మయేశుని ఆత్మలింగము॥
స్వప్రకాశము స్ఫటిక విమలము -
తారకేశుని ఆత్మలింగము।
మెరుపుచుక్కల రసోజ్జ్వలమగు -
పావకాక్షుని ఆత్మలింగము॥
ఙ్ఞాననేత్రపు కంటి పాపయె -
పరాత్పరుని ఆత్మలింగము।
పంచాక్షరిని పలుకఁ జేసెడి -
పంచాననుని ఆత్మలింగము॥
గొల్లభామకు వెనుక నడచిన -
కోటీశ్వరుని ఆత్మలింగము।
భక్తుల కర్మ ముడులు విప్పెడి -
విశ్వేశ్వరుని ఆత్మలింగము॥
విశ్వమంతయు నాక్రమించిన -
స్వయంభు విభుని ఆత్మలింగము।
అష్టసిద్ధుల నతిశయించెడి -
ఓంకార శివు ఆత్మలింగము॥
అష్టదరిద్ర మంతము జేయు -
అగ్నిలోచను ఆత్మలింగము।
అష్టసిరులను అందించెడిది -
హిరణ్యేశ్వరుని ఆత్మలింగము॥
ఆరోగ్యకర మాయుష్కరము -
అమరేశ్వరుని ఆత్మలింగము।
భయమును బాపి ధైర్యమునిచ్చు -
వజ్రేశ్వరుని ఆత్మలింగము॥
పాండిత్యమును ప్రసాదించెడి -
నాసికేశ్వరు ఆత్మలింగము।
కవితాశక్తి ధారనిచ్చెడి -
కాలాంతకుని ఆత్మలింగము॥
సంతానమును సుఖమునిచ్చెడి -
గణేశ గురుని ఆత్మలింగము।
అపమృత్యువును ఆపివేసెడి -
కాలాంతకుని ఆత్మలింగము॥
అర్జున రథము ముందు నడచెడి -
విజయేశ్వరుని ఆత్మలింగము।
శిబి పరీక్షను చేసినట్టిది -
కపోతేశ్వరు ఆత్మలింగము॥
వ్యాఘ్రమునెక్కి మహిషిఁజంపిన -
మణికంఠ గురు ఆత్మలింగము।
విషయవిషమును విరుగుడుఁజేయు -
శేషహారుని ఆత్మలింగము॥
అద్వైతమత భాష్య వాదము -
ఆదిశంకరు ఆత్మలింగము।
మండనమిశ్రు నోడించినది -
వ్యుప్తకేశుని ఆత్మలింగము॥
సర్వఙ్ఞ పీఠమెక్కి వెలిగిన -
శృంగ గిరీశు ఆత్మలింగము।
దత్తగురువే కౌగిలించిన -
కేరళ శివుని ఆత్మలింగము॥
దత్తశివునికి హృదయమందున -
సృష్టి చేయగ మొదట పుట్టిన।
సంకల్పమగు శక్తి వీచియె -
అనఘాకృతియే ఆత్మలింగము॥
