బ్రహ్మలహరి - దివ్యదర్శనముల నిచ్చుట - 15

గ్రీష్మమును శమింపచేయుట.

స్వామి సాక్షాత్తు శ్రీదత్తభగవానులే. పంచభూతాలు ఆయన వశవర్తులే. విజయవాడలో ఒక సంవత్సరము గ్రీష్మప్రతాపము తగ్గించమని భక్తులు వేడుకున్నారు. "కాల, కర్మములలో జోక్యము చేసుకొనరాదు అయినా నిరూపణము కొరకు తగ్గింతును" అని స్వామి తాను రచించిన "శ్రీదత్తదేవం యోగాధినాథం - కోటి సుగుణ సుందరాయ" అను భజన చేయించారు. భజన తరువాత ఇట్లు వచించారు. "ఈ సూర్యుని తేజస్సు దత్తుని తేజస్సు చేత ప్రకాశించుచున్నది" అంటూ నిమీలితనేత్రులైనారు స్వామి. ఇంతలో సాయంకాలము 4 గం॥ అయినది.

ప్రచండభానుడు కొంచెం, కొంచెం శాంతిస్తున్నాడా అన్నట్లుంది. ఆకాశము మేఘావృతమైనది. ఉరుములు, మెరుపులతో కుంభవృష్టి కురిసినది. మరునాటి నుండి ప్రకృతి శాంతించినది. ఆహా! ఎంతటి మహిమ. మరుసటి సంవత్సరము కూడా భక్తుల ప్రార్థన మేరకు స్వామి స్పందించారు. అలానే చేసారు. ఆ తరువాత సంవత్సరము "కాల చక్రమున, కర్మచక్రమున జోక్యము చేసుకొనరాదని" స్వామి భక్తులకు వివరిస్తూ, "ఇట్టి కోరికలు కోరకండి" అని హితవు చెప్పారు. ఆహా! పంచభూతములు స్వామి వశవర్తులనుటకు ఇది నిదర్శనము కాదా!