Posted on: 25 Jun 2023
[Translated by devotees of Swami]
[ശ്രീ ഭരത് കൃഷ്ണ എഴുതിയത്]
പാദനമസ്കാരം സ്വാമി,
ഒരു വലിയ ബൈക്ക് അപകടത്തിൽ നിന്ന് ശ്രീ ദത്ത സ്വാമി എന്നെ രക്ഷിച്ച സമീപകാല അത്ഭുതം വിവരിക്കാൻ ഞാൻ ആഗ്രഹിക്കുന്നു.
കഴിഞ്ഞ ആഴ്‌ച രാവിലെ 7 മണിക്ക് ഞാൻ ബൈക്കിൽ ഓഫീസിലേക്ക് പോവുകയായിരുന്നു. 2-വേ (2-way) റോഡിലൂടെയാണ് ഞാൻ എല്ലാ ദിവസവും എന്റെ ഓഫീസിലേക്ക് പോകുന്നത്. ആ ദിവസം, റോഡിന്റെ ഇടതുവശത്തായി ഒരു കാർ നിർത്തിയിരുന്നു, റോഡിന്റെ വലതുവശത്ത് ഒരു ലോറി എന്റെ നേരെ വരുന്നുണ്ടായിരുന്നു. ലോറി കടന്നുപോകുന്നതുവരെ കാത്തിരിക്കേണ്ടിവരാതിരിക്കാൻ ഞാൻ കാറിനെ മറികടക്കാൻ തീരുമാനിച്ചു.
ഒരു നിശ്ചിത സമയം വരെ സാവധാനത്തിലും ശ്രദ്ധയോടെയും ബൈക്ക് ഓടിക്കാൻ സ്വാമി നേരത്തെ നിർദ്ദേശിച്ചിരുന്നു. ജ്യോതിഷ വീക്ഷണത്തിൽ എന്റെ സമയം നല്ലതല്ലെന്ന് അവിടുന്ന് എന്നോട് പറഞ്ഞു. സ്വാമിയുടെ നിർദ്ദേശങ്ങൾ ദേവി മാമുമായി (സ്വാമിയുടെ വളരെ അടുത്ത ഒരു ഭക്ത) ചർച്ച ചെയ്തപ്പോൾ, അവിടുത്തെ നിർദ്ദേശങ്ങൾ ഒരു നിശ്ചിത കാലയളവിലേക്ക് മാത്രമല്ല, വാസ്തവത്തിൽ, എല്ലായ്‌പ്പോഴും പാലിക്കേണ്ടതാണെന്നും അവർ എന്നോട് പറഞ്ഞു.
ഞാൻ സാധാരണയായി എന്റെ ബൈക്ക് സ്പീഡിൽ ഓടിക്കാൻ ഇഷ്ടപ്പെടുന്നു, പക്ഷേ സ്വാമി എന്നോട് പതുക്കെ ഡ്രൈവ് ചെയ്യാൻ നിർദ്ദേശിച്ചതിനാൽ, 50 KMPH-ൽ കൂടുതൽ വേഗത്തിൽ പോകേണ്ടെന്ന് ഞാൻ തീരുമാനിച്ചു.
എന്റെ കഥയിലേക്ക് തിരിച്ചു വരാം, ഞാൻ സ്വയം നിശ്ചയിച്ച 50 KMPH വേഗപരിധിക്കുള്ളിൽ അന്ന് കാറിനെ മറികടക്കാൻ എളുപ്പമായിരുന്നു. അതനുസരിച്ച് ഞാൻ ബൈക്കിന് വേഗത കൂട്ടി. എന്നാൽ പെട്ടെന്ന്, കാറിന് പിന്നിൽ ബൈക്കിൽ വെറുതെ ഇരുന്ന മറ്റൊരു ബൈക്ക് യാത്രികൻ പെട്ടെന്ന് ഡ്രൈവ് ചെയ്യാൻ തുടങ്ങി. അവൻ റോഡിൽ വന്ന് എന്റെ വഴി തടഞ്ഞു. കാറിനെ മറികടക്കാനുള്ള ഒരാൾക്ക് മാത്രം സ്ഥലമുണ്ടായിരുന്നുള്ളൂ. ഉടനെ ഞാൻ രണ്ടും ബ്രേക്ക് ചവിട്ടി, എന്റെ ബൈക്ക് സ്കിഡ് ചെയ്യാൻ തുടങ്ങി. ആ നിമിഷം, തീർച്ചയായും ഒരു അപകടം സംഭവിക്കാൻ പോകുകയാണെന്ന് ഞാൻ കരുതി!
എന്നാൽ സ്വാമിയുടെ കൃപയാൽ എന്റെ മുന്നിലുണ്ടായിരുന്ന ബൈക്ക് യാത്രികനും ഉടൻ തന്നെ ലോറിയും നിർത്തി. വഴിതടയുന്ന രണ്ടു വാഹനങ്ങളും നീങ്ങി നിന്നെങ്കിലും എന്റെ ബൈക്ക് അപ്പോഴേക്കും സ്കിഡ് ചെയ്യാൻ തുടങ്ങിയിരുന്നു. യുക്തിസഹമായി, ഞാൻ ലോറിയിൽ നേരിട്ട് ഇടിക്കുകയോ അല്ലെങ്കിൽ ലോറിയുടെ മുൻവശത്തെ ടയറിനടുത്ത് വീഴുകയോ ചെയ്യണമായിരുന്നു. അതിശയകരമെന്നു പറയട്ടെ, രണ്ടും സംഭവിച്ചില്ല!
എന്റെ ബൈക്ക് ചെറുതായി കുലുങ്ങുകയും പൂർണ്ണമായും സമനില തെറ്റുകയും ചെയ്തു. എന്നിരുന്നാലും, ബൈക്ക് എങ്ങനെയോ തനിയെ ഒരു തിരിവെടുത്തു, ഞാൻ വീഴാതെ തികച്ചും സുരക്ഷിതമായ സോണിൽ എത്തി. എനിക്ക് ഒരു പോറൽ പോലും ഉണ്ടായില്ല! ആ അപകടത്തിൽ നിന്ന് രക്ഷപ്പെടാൻ എന്നെ സഹായിച്ചത് നിസ്സംശയമായും സ്വാമിയാണ്. ഗ്രിപ്പ് നഷ്ടപ്പെട്ടതിന് ശേഷം ഒരു ബൈക്ക് ശരിയായി തിരിയാൻ ഒരു വഴിയുമില്ല, പക്ഷേ അന്ന്, എന്റെ ഇടപെടലില്ലാതെ അത് സംഭവിച്ചു.
ഇത് നമ്മുടെ സ്വാമിയുടെ അത്ഭുതമാണെന്ന് എന്റെ മനസ്സിൽ 100 ശതമാനം ഉറപ്പായിരുന്നു! ഈ അപകടത്തിൽ നിന്ന് എന്നെ രക്ഷിച്ചതിന് വളരെ നന്ദി, സ്വാമി. അങ്ങ് എനിക്ക് മുമ്പ് നിരവധി മുന്നറിയിപ്പുകൾ നൽകിയിട്ടുണ്ട്, പക്ഷേ ഞാൻ അവ കൃത്യമായി ശ്രദ്ധിച്ചില്ല. അങ്ങയുടെ സംരക്ഷണം ഞാൻ അർഹിക്കുന്നില്ല, എന്നിട്ടും, അങ്ങയുടെ യുക്തിരഹിതമായ ദൈവിക സ്നേഹത്താൽ ആ അപകടത്തിൽ നിന്ന് അങ്ങ് എന്നെ സംരക്ഷിച്ചു.
മുമ്പ് പലതവണ പല അപകടങ്ങളിൽ നിന്നും അങ്ങ് എന്നെ രക്ഷിച്ചതായി എനിക്കറിയാം. സ്വാമി, ഇനി മുതൽ കൂടുതൽ ശ്രദ്ധയോടെ ബൈക്ക് ഓടിക്കാൻ ഞാൻ വാഗ്ദാനം ചെയ്യുന്നു.
ജയ് ഗുരു ദത്ത സ്വാമി.