శ్రీ దుర్గాష్టకమ్‌

ఉమయా రమయా విరిఞ్చిదేవ్యా, మిళితాభి ర్మహిషాసురక్షయాయ ।
ఉదితే! సురబృన్దగీయమానే! విజయాద్రేః కనకామ్బ! పాహి దుర్గే! ॥1॥

దశహస్తధృతాయుధై ర్మహోగ్రైః, ఘనశార్దూలమహాంస సన్నిషణ్ణే! ।
సమరాన్తజయోత్సవార్చ్యమానే! విజయాద్రేః కనకామ్బ! పాహి దుర్గే! ॥2॥

కమలం నిజ దక్షిణాఙ్కనీతం, పద ముత్తాన ముపోహ్య వామ మాహో! ।
శరణాగత రక్షణాయ భాసి, విజయాద్రేః కనకామ్బ! పాహి దుర్గే! ॥3॥

కనకద్యుతి భాసమానకాయే! కనకవ్యాఘ్ర మహోగ్రవాహనస్థే! ।
కనకాభరణై ర్విరాజమానే! విజయాద్రేః కనకామ్బ! పాహి దుర్గే! ॥4॥

తవ చిత్తదయాబ్ధి వత్సలత్వా, త్ప్రవిభక్తా ఽఽయుధశక్తి రాత్మజేషు ।
విధి విష్ణు శివాది దైవతేషు, విజయాద్రేః కనకామ్బ! పాహి దుర్గే! ॥5॥

శరణం జననీతి యాచకాయ, నిజభక్తాయ సుతాయ దుర్నివారమ్‌ ।
అభయం ప్రదదాసి పాణినా త్వం, విజయాద్రేః కనకామ్బ! పాహి దుర్గే! ॥6॥

జగతాముదయాయ భారతీ త్వం, స్థితయే మఙ్గళదేవతా విభూత్యా ।
ప్రళయాయ మహేశ్వరీ భవానీ, విజయాద్రేః కనకామ్బ! పాహి దుర్గే! ॥7॥

అమరా మహిమార్ణవా స్సమే ఽపి, తవ పాదాన్త్యనఖార్క పాదమాత్రాః ।
అయి! కారణ కార్య మూల శక్తే! విజయాద్రేః కనకామ్బ! పాహి దుర్గే! ॥8॥

ఇదం దుర్గాష్టకం దివ్యం, కాశ్యపేన కృతం పఠన్ ।
యదిచ్ఛతి తదాప్నోతి, శక్తే రప్రతికూలతః ॥