శ్రీబుద్ధావతారాష్టకమ్‌

ఓం నమో నారాయణాయ, ఓం నమో విష్ణవే

అహింసాం స్వకైవల్యమార్గం వదన్తం, మహాసాత్త్వికాజాది జన్తుష్వపారామ్‌ ।
దయాం దర్శయన్తం క్రతూ న్వారయన్తం, భజే నాథ నారాయణం బుద్ధదేవమ్‌ ॥1॥

మహాబోధి వృక్షస్య మూలే చిరాయ, తపస్యన్తమన్తః కృపావారి రాశిమ్‌ ।
పరిత్యజ్య భార్యాం సుతం రాజ్యభోగం, భజే నాథ నారాయణం బుద్ధదేవమ్‌ ॥2॥

శిరో ముణ్డకాషాయవాసోవసానం, సరోజాయతాక్షి స్ఫురత్ప్రాణిదైన్యమ్‌ ।
కరే దణ్డముర్వ్యాం చరన్తం సమన్తా, ద్భజే నాథ నారాయణం బుద్ధదేవమ్‌ ॥3॥

గళచ్ఛేదకర్మణ్యజాం నీయమానాం, కృతాశ్రుప్రవాహాం సమాదాయ వత్సే ।
సమాలిఙ్గ్య చోచ్చైస్స్వరేణా ఽఽరుదన్తం, భజే నాథ నారాయణం బుద్ధదేవమ్‌ ॥4॥

అహం సర్వభూతాన్తరాత్మేతి గీతం, పునర్బోధయన్తం పశుచ్ఛేదహింసామ్‌ ।
స్వకీయా మివా ఽఽవేదయన్తం స్వబాష్పైః, భజే నాథ నారాయణం బుద్ధదేవమ్‌ ॥5॥

పరబ్రహ్మవాచా మతీతం తదేవ, వహన్తం చ మౌనం పరబ్రహ్మతత్త్వే ।
అవిద్భిర్మతం నాస్తికం మౌనహేతోః, భజే నాథ నారాయణం బుద్ధదేవమ్‌ ॥6॥

అహింసా పరో ధర్మ ఇత్యేకవాక్యం, సదా వాచయన్తం సమప్రాణిసౌమ్యమ్‌ ।
దయా ప్రేమ వారాంనిధిం పారశూన్యం, భజే నాథ నారాయణం బుద్ధదేవమ్‌ ॥7॥

అహింసా పథా ప్రేమమార్గం స్వలభ్ధ్యై, జగజ్జీవజాలాయ సన్దర్శయన్తమ్‌ ।
మయి ప్రేమవార్ధిం చ కల్లోలయన్తం, భజే నాథ నారాయణం బుద్ధదేవమ్‌ ॥8॥

బుద్ధదేవాష్టకం దివ్యం, కాశ్యపేన కృతం పఠన్ ।
అహింసారతిరాప్నోతి, విష్ణుప్రీతికర స్సుఖమ్‌ ॥