Posted on 22 Oct 2026. 
Share
ఓం నమోనారాయణాయ, ఓం నమో విష్ణవే
జగత్పాపకూపం విలోక్యాన్యమార్గం, న పశ్యన్తమన్తా త్సమన్తా చ్చరన్తమ్‌ ।
కరే వైద్యుతం ఖడ్గమాధాయ సాశ్వం, భజే నాథ నారాయణం కల్కిరూపమ్‌ ॥1॥
పరో నాస్తి నాస్తీతి విశ్వాసవాదాన్, జనా న్కేవలం భౌతికాధారభోగాన్ ।
సకృ త్సంహరన్తం నిజాసిప్రహారై, ర్భజే నాథ నారాయణం కల్కిరూపమ్‌ ॥2॥
నటత్తుఙ్గరఙ్గత్తురఙ్గోరుపాతైః, క్షణాదేవ సర్వత్ర చా విర్భవన్తమ్‌ ।
ఖలా న్దైవనిన్దాపరా న్మారయన్తం, భజే నాథ నారాయణం కల్కిరూపమ్‌ ॥3॥
జగత్తాతపాదం దయావార్ధి మేవ, వృథా నిన్దతో దూషణై ర్నాస్తికాంశ్చ ।
సహస్రాఙ్గ ఖణ్డ ప్లుతా న్ఖణ్డయన్తం, భజే నాథ నారాయణం కల్కిరూపమ్‌ ॥4॥
అహింసా మితః పూర్వ మేవోక్తవన్తం, దయాభాషణై రప్యహన్తాతిరేకాన్ ।
స్వకీయా న్సుతా నేవ నిఘ్నన్త ముర్వ్యాం, భజే నాథ నారాయణం కల్కిరూపమ్‌ ॥5॥
అనేకైశ్చ సాధూత్తమై ర్దత్తతత్త్వం, తథా ఽప్యాస్తికత్వాతిదూరా న్మనుష్యాన్ ।
క్షమాపారముత్తీర్య కోపాగ్నినాత్తం, భజే నాథ నారాయణం కల్కిరూపమ్‌ ॥6॥
న మే నాథ శక్తిః పరం సోఢు మిత్థం, బ్రువన్తీం సమాశ్వాస్య భూమాతృదేవీమ్‌ ।
స్వయం తాతపాదం సమేతం సరోషం, భజే నాథ నారాయణం కల్కిరూపమ్‌ ॥7॥
అవిద్యా ఽఽశయా న్మయ్యపి ద్రా క్తథైవ, స్వవిజ్ఞానఖడ్గేన నిర్మూలయన్తమ్‌ ।
మన స్సైన్ధవస్థం మదేకైక దైవం, భజే నాథ నారాయణం కల్కిరూపమ్‌ ॥8॥
ఇదం కల్క్యవతారస్య, కాశ్యపేన కృతం పఠన్ ।
అష్టకం దైవవిశ్వాసీ, వర్ధతే సర్వసౌఖ్యవాన్‌ ॥
★ ★ ★ ★ ★