శ్రీ కృష్ణావతారాష్టకమ్‌

ఓం నమో నారాయణాయ, ఓం నమో విష్ణవే

అనేకాసురధ్వంసకార్యాయ సాక్షా, త్స్వయం విష్ణుమేవాగతం పిఞ్ఛమౌళిమ్‌ ।
అభిజ్ఞాపరీక్షాకృతే వేణుపాణిం, భజే నాథ నారాయణం వాసుదేవమ్‌ ॥1॥

స్వయం విష్ణురేవేతి సన్దర్శయన్తం, భవే హ్యేవ శఙ్ఖాది బాహూన్దధానమ్‌ ।
నదీతారణే ఛత్రభూతాదిశేషం, భజే నాథ నారాయణం వాసుదేవమ్‌ ॥2॥

అనూహ్యాని కుర్వన్త మేవేహ బాల్యే, శిలావర్ష గోవర్ధనోద్ధారణాద్యైః ।
మహిమ్నా మపారార్ణవం పూర్ణదైవం, భజే నాథ నారాయణం వాసుదేవమ్‌ ॥3॥

మునీ న్గోపికా రూపిణ స్తర్పయన్తం, మహాప్రేమ ధారాం సదా ఽఽశ్లిష్యరాధామ్‌ ।
నటన్తం చ బృన్దావనే వేణుగానం, భజే నాథ నారాయణం వాసుదేవమ్‌ ॥4॥

కిరీటే చలత్పిఞ్ఛ మాలోలరశ్మిం, కరే వేణునా సూచయన్తం నరాయ ।
స్వగీతార్థతత్త్వం స్వకైవల్యమార్గం, భజే నాథ నారాయణం వాసుదేవమ్‌ ॥5॥

విధీశాది దేవాకరం విశ్వరూపం, జగజ్జఙ్గమస్థావరం దర్శయన్తమ్‌ ।
అతీతం స్వయంభూత మప్యూహదూరం, భజే నాథ నారాయణం వాసుదేవమ్‌ ॥6॥

కుచేలాయ బాల్యే మృషావాదినే ఽపి, సమస్తం ప్రదాతుం సముద్యుక్తమేవ ।
దయాప్రేమరాశిం వ్రజస్త్రీషు లోలం, భజే నాథ నారాయణం వాసుదేవమ్‌ ॥7॥

అకర్తుం చ కర్తుం వికర్తుం సమర్థం, స్వమేకం పతిం బోధయన్తం శరణ్యమ్‌ ।
ఉదఙ్కాయ విశ్వస్వరూపం సృజన్తం, భజే నాథ నారాయణం వాసుదేవమ్‌ ॥8॥

ఇదం శ్రీవాసుదేవస్య, కాశ్యపేన కృతం పఠన్ ।
అష్టకం విష్ణుకైవల్యం, సాక్షాదేవ సమశ్నుతే ॥