శ్రీవరాహవతారాష్టకమ్‌

ఓం నమో నారాయణాయ, ఓం నమో విష్ణవే

హిరణ్యాక్ష పాదాభిఘాతభ్రమద్భూ-నభః కన్దుకం దంష్ట్రయా ధారయన్తమ్‌ ।
ధరాదేవతా వల్లభాక్రన్దనాత్తం, భజే నాథ నారాయణం శ్రీవరాహమ్‌ ॥1॥

సమాకృష్య దైత్యం మహోగ్రాహవాన్తే, త్రిధా దారయన్తం స్వదంష్ట్రాద్వయేన ।
పదేనోత్క్షిపన్తం ప్రతీకారశాన్తం, భజే నాథ నారాయణం శ్రీవరాహమ్‌ ॥2॥

ముహుర్ఘుర్ఘురుధ్వాన తీవ్రోగ్రరోష-భ్రమావేశపాదాభిఘాతై ర్నటన్తమ్‌ ।
జగద్భ్రామయన్తం స్ఫురత్తామ్రనేత్రం, భజే నాథ నారాయణం శ్రీవరాహమ్‌ ॥3॥

నభో మేఘనీలం త్రిపుణ్డ్రాఙ్కఫాలం, గదాశఙ్ఖచక్రాభయం పాణిపద్మైః ।
శ్రియోరస్స్థలే దంష్ట్రికాయాం పృథివ్యా, భజే నాథ నారాయణం శ్రీవరాహమ్‌ ॥4॥

సదా స్వర్ణదృష్టిం హిరణ్యాక్షమేవ, భువం క్షోభయన్తం స్వపాపేన జీవమ్‌ ।
స్వవిజ్ఞానదంష్ట్రాహతం మోచయన్తం, భజే నాథ నారాయణం శ్రీవరాహమ్‌ ॥5॥

దయార్ద్రావలోకేన భక్తిప్రసన్నం, శనైశ్చాలయన్తం స్వతుణ్డం విలమ్బి ।
పదాలమ్బినే దత్త హస్తావలమ్బం, భజే నాథ నారాయణం శ్రీవరాహమ్‌ ॥6॥

అవిజ్ఞానమృత్పిణ్డ భూబిమ్బకల్పం, హిరణ్యాక్షలోభాసురేణాతి విద్ధమ్‌ ।
పతన్తం చ మాముద్ధరన్తం స్వభక్తం, భజే నాథ నారాయణం శ్రీవరాహమ్‌ ॥7॥

అవామాఙ్క మారోప్య వామాఙ్ఘ్రిపద్మం, ప్రియాం దేవతాం వామమఙ్కం చ పద్మామ్‌ ।
సురై స్స్తూయమానం సుఖాసీనమేనం, భజే నాథ నారాయణం శ్రీవరాహమ్‌ ॥8॥

శ్రీవరాహావతారస్య దివ్యాష్టకమిదం పఠన్ ।
కాశ్యపేన కృతం కృచ్ఛ్రా దుద్ధృతో న పతత్యధః ॥